Cordial beinvegni a Trun
La Fiasta da cant cantunala dil Grischun ha liug ils 9 e 10 da zercladur 2012 a Trun. Il Chor cecilian Trun ha surpriu l’organisaziun. Pil chor, gie per l’entira vischnaunca eis ei ina gronda sfida d’organisar ina fiasta da tala dimensiun. Ei drova igl agid da bia gidontras e gidonters, voluntarias e voluntaris. Il comite d’organisaziun ha entschiet cun grond optimissem e plascher sia lavur.
Nossa finamira ei, cun igl agid da l’entira populaziun, dad esser in bien vitg hospitont. In vitg che resta a cantaduras e cantadurs, visitadras e visitaders da lunsch e damaneivel en buna memoria. La fiasta da cant duei esser ina fiasta populara. Ina fiasta per giuven e vegl. Ina fiasta per cantar, tedlar, veser, seveser e star da cumpignia.
A tuts chors che visetan la fiasta a Trun, sut il motto cant a Trun, in cordial beinvegni, ina biala fiasta cun bien success. Buc emblidar lein nus tuttas visitadras e visitaders dalla fiasta – seigies beinvegni a Trun.
| Daniel Tuor |
Matilda Maissen-Petschen |
| President CO |
Presidenta Chor cecilian Trun |
Caras cantaduras e cars cantadurs
Preziadas dirigentas e dirigents
Stimadas suprastonzas
Igl onn 2006 ha giu liug a Cuera la davosa Fiasta da cant cantunala dil Grischun. Tenor statutas da noss’uniun ha quella liug mintgamai en in turnus da 6 onns, pia ei la proxima gia igl onn 2012. A caschun dalla radunonza da delegai dils 19 da mars 2009 a Surrein han delegadas e delegai surdau l’organisaziun dalla proxima fiasta al Chor cecilian Trun. A Trun eisi vegniu fundau in comite d’organisaziun che ha gia fatg differentas preparitivas. Trun vegn a far tut il pusseivel per saver porscher all’entira populaziun da nies cantun dus bials ed emperneivels dis da fiasta.
En num dall’Uniun cantunala da cant dil Grischun appelleschel jeu a tuts chors da noss’uniun da prender part da quella fiasta. Ina sentupada cantica da quella dimensiun dat segiramein ad in e scadin bia cuntentientscha e satisfacziun.
Cun quels pauc plaids giavischel a Vus tuts vinavon bia plascher vid il cant e ditgel gia oz sin seveser sil pli tard ils 9/10 da zercladur 2012 a Trun.
Retus Giger
President Uniun cantunala da cant dil Grischun
e commember dil comite d’organisaziun
